O Concello de Boiro segue avanzando nas obras da construción do
inmoble que será a nova sede do Club de Remo de Cabo de Cruz, que está
previsto que estea rematado a finais de ano. O concelleiro de Urbanismo e
Obras, Luís Ruiz, visitou as instalacións acompañado do arquitecto municipal, Emilio Piña, para supervisar a execución das obras.
Despois de varios retrasos na execución da obra, producidos por un poste de alta tensión, e dunhas modificacións do proxecto para redeseñar o aspecto do mesmo, a obra avanza a bo ritmo e ten de prazo de execución ata finais deste ano. Está realizada xa a cimentación e a estrutura, así como colocada a cuberta e os paneis da fachada.
O Concello de Boiro, a empresa adxudicataria e o Club de Remo están
en contacto constante para que o resultado final da obra se adapte ás
necesidades dos deportistas. Nas ultimas semanas fíxose algún pequeno
axuste na ubicación de portas e ventas no interior da instalación para que estas se adapten as necesidades dos remeiros. Os operarios traballan agora na tabicación interior e o illamento, para proceder despois a rematar as
instalacións interiores, os arranxos de carpintaría e acabados.
