O Concello de Ribeira vén de informar que a comunidade de usuarias e usuarios da Unidade de Asistencia de Drogodependencias (UAD) participará nos almorzos solidarios que elabora o alumnado do obradoiro de cociña O Pote. A iniciativa, inserida no programa Almorzos Saudables do obradoiro, desenvolverase este mércores en horario de 11.30 a 12.30 horas nas instalacións da Escola Municipal de Hostalería (segundo andar do mercado municipal). Na actividade, os usuarios da UAD de Ribeira terán oportunidade de degustar distintas receitas elaboradas polo alumnado do taller, baixo a tutela do profesor Patxi Mobilla.
Os diferentes pratos estarán preparados sobre a base de diversas materias primas naturais como froitas, xamón, queixo ou zumes. Xunto aos usuarios da UAD estará o seu profesor de carpintería, Manuel Casais, ademais dos concelleiros de Servizos Sociais e de Promoción Económica, Ana Ruiz e Ramón Doval.
