20190731. Coma cada mes desde fai case 6 anos, a Plataforma de Emigrantes Retornados do Barbanza congregouse esta mañá diante da delegación de Facenda de Ribeira, para despois manifestarse polas rúas da cidade ata a praza do Concello.
Carlos Ansoar, en calidade de voceiro da plataforma, manifestou que a situación que viven estas persoas vén por “esa lei inxusta, arbitraria e discriminatoria que fixo o PSOE no seu momento con Zapatero, que a deixaron nun caixón, e despois chegou o PP que veu cartos e empezou a aplicala.” Deste xeito, indicou que a súa aplicación significa que exista dobre pagador e que os xubilados desta zona empecen a cotizar a partir de 12.500 euros, mentres que os que sempre traballaron en territorio español é a partir de 22.000 euros. Ansoar expresou que a pretensión destas mobilización é “pagar o que lle corresponde coma outro traballador do Estado español.”
Tamén apuntou que Europa xa emitiu dúas sentenzas a favor destas reclamacións, pero que os diferentes Gobernos obviaron esas obrigas.
Por outra banda, sinalou que estas manifestacións serven para que se vaian solucionando e avanzando en moitos casos. Por iso, cada vez hai menos xente, feito ao cal se engade a morte dalgúns dos seus integrantes.
Outro dos aspectos que quixo puntualizar Ansoar foi que a Administración Pública “sempre tenta facer demagoxia e manipular de que o que reclaman é que eles non queren pagar”, procurando desacreditar así o labor destes xubilados.
Así mesmo, afirmou que “o presidente da Xunta nunca se quixo reunir con este colectivo porque, como é unha cousa a nivel estatal, xa non ten nada que pintar aí, cousa que sempre lle recriminamos porque el é o representante máximo das galegas e dos galegos.”
Ademais, aproveitou para lembrar a Manolo Domínguez, presidente da Asociación de Emigrantes Retornados ‘Marusía’, quen faleceu días atrás e que “tanto fixo para que os emigrantes retornados consigan todo isto polo que están loitando.”
