O departamento de Deportes do Concello de Boiro organizará neste curso acabado de comezar (o curso 2020-2021) a nova edición (a 28) das Escolas Deportivas Municipais, un amplo programa de dinamización e formación deportiva que arrinca este primeiro de outubro e que cubre as demandas tanto da poboación adulta como da infantil e xuvenil. As inscricións están abertas e poden facerse directamente no departamento de Deportes, na Casa da Cultura de Boiro.
A axenda para maiores inclúe ximnasia para xubilados, bailes de salón, tenis e tamén actividades ao abeiro do programa Boiro Actívate, con propostas para persoas con patoloxías ou doenzas moi específicas.
Pola súa banda, o programa deportivo infantil e xuvenil recolle propostas para a mellora da motricidade, tenis, ciclismo, atletismo, programa de promoción de voleibol, voleibol, xadrez, remo, piragüismo, baloncesto, tríatlon, natación, golf, vela e patinaxe artístico.
Ademais das distintas escolas deportivas, vanse disputar ao longo do ano diversas competicións deportivas nas distintas instalacións das que dispón o Concello. As persoas usuarias interesadas poden solicitar o uso de diversas instalacións para a práctica deportiva no teléfono 981 84 84 25 ou no enderezo electrónico deportes@boiro.org.
As inscricións para as Escolas Deportivas Municipais 2020-2021 do Concello de Boiro están abertas e deben facerse de xeito presencial no departamento de Deportes, situado na Casa da Cultura Ramón Martínez López de Boiro.
