O dúo musical Two in the Mirror, formado pola cantante Noelia Pérez e o músico Paco Dicenta e especializado en dar innovadoras viraxes a temas clásicos de soul, jazz, funk e pop (en inglés pero tamén en castelán, italiano, portugués e mesmo en hebreo), estará este domingo 6 de setembro en Porto do Son para ofrecer un concerto de sesión vermú, na praza de España da vila.
Two in the Mirror, procedente de Vigo, comezou a súa andaina como dúo en abril de 2012, coincidindo co aniversario do Estudo Torai do fotógrafo Aitor Nova. Dende aquela Noelia e Paco percorreron mancheas de escenarios de Galicia, Leon, Asturias, Madrid e Portugal, participando en todo tipo de eventos artísticos e sociais e cunha bagaxe de centos de concertos ao longo dos seus oito anos de andaina (só no primeiro ano de actividade achegaron máis de 70 actuacións).
