A mostra de gravados Reflexos da Costa da Morte, do artista aguiñense Manuel Ayaso, clausúrase este venres 28 cun recital poético. A cita será no Centro Lustres Rivas, a partir das 20.30 horas. O peche da exposición, que abriu as súas portas a finais de xuño, contará coas intervencións poéticas de Eva Veiga, Antonio Piñeiro, Carlos Pereira e Patricia Torrado, ademais do propio Manuel Ayaso e de representantes do Concello, do Museo do Gravado de Artes e a Asociación Barbantia.
O evento incluirá así mesmo unha visita guiada polo artista e a clausura oficial da exposición. Para participar na actividade, que será sometida aos protocolos COVID para este tipo de actos, cómpre formalizar a inscrición a través do enderezo electrónico pastor@barbantia.es. Será obrigatorio o uso de máscara de protección.
A mostra
A colección que se clausura este venres está constituída por 70 gravados a punta seca creados por Manuel Ayaso e imprimidos por Rosana Calvo e Costa Beiro no obradoiro do Museo do Gravado de Artes. A mostra foi inaugurada o pasado mes de xullo cunha emotiva homenaxe ao artista de Aguiño, un dos máis senlleiros representantes da nosa comarca no panorama artístico nacional e internacional, onde destaca non só pola calidade e orixinalidade da súa obra senón tamén polo longo percorrido no tempo da mesma (Manuel Ayaso naceu en 1934 e leva en activo dende moi novo, xa antes de iniciar os seus estudios artísticos en 1955 como bolseiro da Newark School of Fine and Industrial Arts, en Estados Unidos, ao onde tivo que emigrar coa súa familia).
