20190726. Un total de corenta nadadores, 33 homes e 7 mulleres, van afrontar mañá sábado 27 o reto ArousaMan, travesía a nado entre O Grove e Ribeira que cumpre a súa terceira edición co obxectivo de visualizar o dano cerebral adquirido (DCA).
Participantes de Cuba, Italia, Portugal, Inglaterra, Italia e, dentro de España, de País Vasco, Asturias, Andalucía, Valencia, Madrid, Galicia e Castela e León, sairán desde O Grove, distribuídos en tres grupos ás 09.00, 09.30 e 10.00 horas. O obxectivo é cubrir os 13 quilómetros que separan ambas ribeiras a modo de metáfora das dificultades de convivir co DCA. Cómpre lembrar que esta iniciativa parte de Juan Ramón Martínez, cuxo irmán Manuel Martínez, ‘Manolo Nacho’, está aflito desta afectación.
Durante a proba, na auga haberá 100 persoas en total, entre nadadores (dos 40 participantes, 4 fan a travesía sen traxe de neopreno), patróns e kayakistas. A chegada á praia ribeirense de Coroso, á altura do centro de raqueta, está prevista para ao redor das 14.30 horas, se ben xa dende as 12.00 horas estará habilitado un dispositivo na propia area para difundir información e concienciar á sociedade sobre o DCA.
