O campo da festa de San Roquiño, en Lousame, acollerá este venres 7 de agosto, ás 22:00 horas, a primeira das dúas Noites de Cine organizadas polo Concello en colaboración coa Deputación da Coruña. A película elixida é O que arde, dirixida por Óliver Laxe e que, segundo explican os organizadores do ciclo, “aborda unha problemática ben coñecida no municipio: a desaparición do medio rural a causa dos lumes forestais”. Trátase do filme máis visto na historia do noso audiovisual, cun reparto formado por actores non profesionais e protagonizado por Amador Arias e Benedicta Sánchez, premio Goya á mellor actriz revelación.
Para o venres 28 de setembro, tamén ás 21:30 horas, é a quenda doutro filme de ampla presenza galega, tanto nos actores como no argumento como nos escenarios elixidos: Quien a hierro mata de Paco Plaza. A película, protagonizada por Luis Tosar, Xan Cejudo e Ismael Martínez, poderá verse na praza do Concello (Portobravo). En ambos casos, en caso de choiva, a proxección tería lugar no auditorio da Casa da Cultura Santeiros de Chave.
