O programa presentado na casa consistorial polo presidente da agrupación, José Cerqueiras; o director, Santi Mella; e o alcalde, Anxo Arca, estrutúrase arredor de tres grandes citas: os concertos de Santa Icía, de Aninovo e de Rosalía.

Padrón. A Banda de Música Municipal de Padrón deu a coñecer a súa programación para a tempada 2026-2027, un ciclo cultural que se desenvolverá baixo o lema Cando a música fala. O acto de presentación celebrouse na casa consistorial e contou coa participación do presidente da agrupación, José Cerqueiras; o seu director, Santi Mella; e o alcalde de Padrón, Anxo Arca.

Con esta nova proposta, a formación busca poñer en valor a capacidade da música para transmitir emocións, contar historias e xerar puntos de encontro interxeracionais, consolidándose como un dos principais referentes da vida cultural padronesa e mantendo un estreito vínculo coas tradicións e a identidade local.
A nova tempada articúlase arredor de tres concertos ligados a datas e referentes significativos para o municipio. A programación abrirase o sábado 28 de novembro de 2026, no marco do Outono Cultural, co tradicional Concerto de Santa Icía, unha das citas máis arraigadas no calendario da Banda coa que a agrupación conmemora cada ano a patroa da música.
A seguinte actuación terá lugar o sábado 2 de xaneiro de 2027 coa celebración do Concerto de Aninovo, unha proposta coa que a formación dará a benvida ao novo ano ofrecendo á veciñanza un novo encontro musical. Finalmente, a tempada continuará o sábado 20 de febreiro de 2027 co Concerto de Rosalía, unha cita vinculada á figura de Rosalía de Castro e á profunda relación da escritora coa historia e coa identidade cultural de Padrón.
Desde o Concello de Padrón animan tanto á veciñanza como ás persoas visitantes a acompañar a Banda ao longo destas tres citas culturais.



