A Asemblea de Cooperación pola Paz en Galicia vai inaugurar este martes 17 de novembro (ás 19.30 horas) no Museo Marea do Porto do Son (o museo da memoria mariñeira local) a exposición A unión fai a forsa, unha mostra sobre as mulleres do mar de Galicia e El Salvador. A proposta poderá verse ata o 18 de novembro.
Estará formada por fotografías, testemuños, ferramentas de traballo, cianotipias e elementos sensoriais que achegarán ao público as historias e os saberes das mulleres vinculadas á pesca e ao marisqueo artesanal.
A inauguración coincide coa visita a Galicia de tres mulleres representantes de federacións pesqueiras de El Salvador, nunha experiencia de intercambio con mulleres do mar galegas.
Na mostra porase o foco no que teñen en común as mulleres do mar de Galicia e El Salvador: a relación co mar, os saberes transmitidos de xeración en xeración, a capacidade de organización e moitos retos compartidos.
A exposición dá continuidade ao traballo iniciado en Galicia e El Salvador e propón “unha nova forma de achegarse ás realidades das mulleres do mar”.
A iniciativa nace do encontro de dúas propostas: Elas deciden, en Galicia, e Abraza tu Mar, en El Salvador. Dous procesos que conectan mulleres vinculadas á pesca e ao marisqueo artesanal de ambos os territorios, poñendo en valor os seus coñecementos, as súas experiencias e a importancia do seu traballo nas comunidades costeiras. Desde as redeiras galegas ata as curileiras salvadoreñas, a exposición amosa a diversidade de tarefas e experiencias que forman parte da vida arredor do mar.
A exposición tamén pon o foco na capacidade das mulleres para organizarse, defender os seus dereitos e impulsar iniciativas propias.
“Porque falar do mar é falar tamén de identidade, comunidade, sustentabilidade e futuro, e porque, malia a distancia que separa Galicia e El Salvador, hai experiencias, aprendizaxes e reivindicacións que as conectan”, sinalan dende a Asemblea.
Como dixemos, a inauguración enmárcase na visita a Galicia de tres mulleres representantes de diferentes federacións vinculadas á pesca artesanal salvadoreña. Durante a súa estadía, están a coñecer experiencias de redeiras, mariscadoras e outras iniciativas do sector pesqueiro galego, nunha axenda de encontros que busca favorecer o intercambio de coñecementos e fortalecer as redes de colaboración entre as mulleres e as súas organizacións.
A iniciativa está impulsada pola Asemblea de Cooperación pola Paz (ACPP), en colaboración coa Asociación Fundación para la Cooperación y el Desarrollo Comunal de El Salvador (CORDES), e conta co apoio financeiro da Dirección Xeral de Relacións Exteriores e coa Unión Europea da Xunta de Galicia.
No seu desenvolvemento en Galicia tamén colaboraron Cidadanía S. Coop. Galega e Puraquiteria, na dinamización dos espazos de encontro e intercambio coas mulleres e na elaboración da proposta gráfica e expositiva. O proceso contou tamén coa participación das Redeiras de Portosín e Mulleres Salgadas.
