O alumnado do Obradoiro de Emprego Tahume XI, impulsado polo Concello do Son e o de Ribeira, continúa avanzando este mes de outubro na súa formación práctica a través de diferentes actividades que combinan a adquisición de competencias profesionais coa realización de actuacións de utilidade nos dous termos municipais.
Nas últimas semanas, o alumnado da especialidade de Actividades Auxiliares en Aproveitamentos Forestais participou en xornadas formativas sobre a técnica do resinado nos montes de Baroña, unha iniciativa levada a cabo en colaboración da Comunidade de Montes de Baroña. Esta actividade forma parte da formación correspondente ao certificado de profesionalidade AGAR0209 e permite coñecer de primeira man este aproveitamento forestal tradicional, adquirindo coñecementos e destrezas directamente sobre o terreo.
Pola súa banda, o alumnado da especialidade de carpintería continúa cos traballos de fabricación dos novos peches para os colectores do lixo, que se instalarán nas distintas parroquias do Concello. Esta actuación contribuirá a mellorar a integración destes elementos na contorna e a imaxe dos espazos públicos.
Deste xeito, o Obradoiro de Emprego Tahume XI mantén o seu compromiso cunha formación eminentemente práctica, que facilita a aprendizaxe de técnicas profesionais e, ao mesmo tempo, impulsa actuacións que repercuten positivamente na mellora dos servizos e dos espazos municipais.
