UCIN Boiro denuncia que a AC-305 ao seu paso por Boiro “foi cortada esta mañá por traballos de asfaltado sen ningún aviso previo a veciños nin condutores”. A agrupación engade que “a falta de información provocou colas quilométricas e un importante colapso do tráfico na zona”, e que “moitas persoas atopáronse co corte ao chegar, sen posibilidade de alternativa nin de planificar o seu desprazamento”.
As consecuencias, din, “foron atrasos no traballo, dificultades para levar aos nenos aos centros educativos e problemas para chegar a citas médicas”.
Para UCIN Boiro, “nunha vía de tanto tránsito, un corte destas características afecta a miles de persoas” e “unha actuación deste tipo debe planificarse e comunicarse con antelación, con información clara sobre datas, horarios e desvíos”.
Critican tamén que malia non ser responsábel da obra “o Concello de Boiro non informara do corte malia dispor de redes sociais e outras canles de comunicación que utiliza acotío”.
“Non cuestionamos que se asfalte, que é necesario, senón que se faga ás costas dos veciños”, sinala o coordinador de UCIN Boiro. “Informar é unha obriga básica, e máis cando hai ferramentas para facelo de forma inmediata e gratuíta”.
Por todo iso, UCIN Boiro esixe que se expliquen os motivos desta falta de comunicación e que, en futuras obras en vías principais, avísese coa debida antelación a través de todas as canles dispoñíbeis, así como con sinalización suficiente na propia estrada.
