A asociación ecoloxista ADEGA pon a punto a XV Limpeza Simultánea de Praias, que terá lugar nun total de 22 concellos da costa galega ao longo desta fin de semana, 16, 17 e 18 de outubro, baixo o lema Únete á marea!. Nela participarán case 40 entidades, entre asociacións, concellos, colectivos ecoloxistas, centros de ensino. Moitas destas entidades son participantes asiduas neste tipo de limpezas, “mais tamén hai novas entidades que se suman agora por primeira vez a esta gran convocatoria do voluntariado galego”, informou ADEGA.
Pola contorna do Barbanza e Muros-Noia participarán o CEIP RAmón de Artaxa (Muros), o CEIP Ricardo Tobío (Muros), ADEGA Compostela (en Muros), a Asociación Cultural Mar de Muros (Muros), Noia Limpa (Noia). a Asociación de Veciños A Insuela de Panchés (Carnota), a Asociación de Veciños de Insua – Lariño (Carnota), o Concello da Pobra do Caramiñal (A Pobra), o CEIP do Porto do Son, AFEDIX Santiago (no Porto do Son) e o CEIP de Portosín (O Son).
Entre os concellos colaboradores atópase novamente o de Muros. Tamén a asociación ambiental Noia Limpa.
Segundo explica ADEGA, “son chamados a participar nesta cita anual centros de ensino, escolas de surf e mergullo, clubs de piragüismo e vela, sector da pesca e marisqueo, concellos do litoral, e entidades de todo tipo de Galiza, tanto públicas como privadas, ademais das persoas particulares”.
As limpezas mobilizarán numeroso voluntariado ambiental que se desprazará a praias de toda a costa galega para contribuír a deixalas libres de lixo.
Mapa de limpezas
Para facilitar a inscrición de persoas, ADEGA pon a disposición un mapa con todas as convocatorias previstas ao longo da costa galega. Aquelas que estean impulsadas por grupos abertos que permitan inscrición contarán coa información de contacto necesaria para unirse á limpeza; e nas redes sociais de cada entidade organizadora tamén estará dispoñíbel a toda a información. ADEGA chama a todas as persoas que queiran participar nesta gran xornada de voluntariado “a procurar no mapa a súa praia máis próxima e a contactar coa asociación ou concello que organiza a limpeza nela”.
As limpezas serán ecolóxicas, non mecanizadas, e tratarán de eliminar boa parte dos residuos que están nas praias, coa idea de chamar a atención da sociedade sobre a contaminación procedente de terra adentro.
ADEGA lembra que as principais causas desta problemática ambiental débense situar no modelo de consumo e produción baseado no “usar e tirar”, na deficiente xestión dos residuos que xeramos e na falta de concienciación dalgúns sectores da poboación. Todo iso provoca que, cada ano, 10 millóns de toneladas de lixo rematen nos océanos, procedentes, en parte, da industria do mar (pesca, extraccións…), pero tamén dos nosos fogares.
Nesta 15ª edición, colaboran na Limpeza Simultánea de Praias os concellos de Ares, Cangas, Fene, Muros, Nigrán e O Grove.
