O Ciclo de Cine Mestre Mateo, impulsado nos concellos pola Academia Galega do Audiovisual, volveu poñer o foco en Boiro para dar coñecer ao público a rica colleita cinematográfica galega deste último ano. Sen ir máis lonxe, este domingo 18 de outubro proxectarase no Centro Social de Boiro ás 19.00 horas o documental 360 curvas, dirixido por Alejandro Gándara, Ariadna Silva Fernández.
360 curvas marcan a distancia que separa A Fonsagrada de Lugo. Este camiño longo, difícil e descendente entre montañas, reflicte o declive dun lugar que, a comezos dos anos 90, decidiu loitar pola súa supervivencia nunhas revoltas sen precedentes coñecidas como As Movidas. Narrada entre un pasado e un presente non tan afastados, esta é a historia dunha comunidade rural que se nega a desaparecer.
