A Asociación Boirense de Empresas (ABE) acolleu este venres 9 de outubro un novo encontro do proxecto Xeografía Empresarial, que reuniu en formato almorzo e con aforo completo a representantes de 55 empresas para reflexionar sobre o presente e o futuro da industria e do sector agroalimentario galego.
O encontro, celebrado no salón de actos da ABE, forma parte de Xeografía Empresarial: ruta para o futuro de Galicia, unha iniciativa que percorre diferentes territorios da comunidade para coñecer de primeira man as realidades empresariais que están a marcar o presente e o futuro da economía galega.
Nesta terceira edición, o foco situouse en Boiro e nun dos principais motores económicos do territorio: a actividade conserveira e agroindustrial. Un ecosistema empresarial que conecta a industria co sector primario, sostén cadeas de valor complexas e proxecta a produción galega cara a mercados nacionais e internacionais.
Ao longo do encontro analizáronse algúns dos principais retos aos que se enfronta este tecido produtivo, nun contexto marcado pola presión sobre os custos, as novas esixencias regulamentarias e a evolución dos mercados. A eficiencia operativa, a transformación e diversificación produtiva, a cooperación co sector primario e o acceso aos mercados internacionais centraron boa parte do debate.
A apertura da xornada contou coa participación de Daniel García Dosil, presidente da Asociación Boirense de Empresas; Sara Rodríguez, presidenta de Hermasa e membro da Xunta Directiva do Círculo de Empresarios de Galicia; e Norberto Penedo, director da Área de Competitividade do IGAPE.
A parte central do encontro foi unha conversa entre Ángel Martínez Martelo, director xeral de JEALSA-Escurís, e Elena Fontán, fundadora e CEO de Orixe Salgada.
Os dous relatores compartiron a súa experiencia e visión sobre a evolución dos seus proxectos, os retos actuais da actividade industrial e as oportunidades que ofrece a transformación empresarial, achegando perspectivas diferentes sobre a capacidade de adaptación das empresas e a súa contribución ao desenvolvemento do territorio.
O formato almorzo permitiu ademais xerar un espazo máis próximo para o intercambio de experiencias e o contacto entre as empresas participantes, favorecendo o diálogo e a creación de novas conexións dentro do tecido empresarial local.
Para Daniel García Dosil, presidente da ABE, “é importante que desde Boiro sexamos capaces de falar tamén de empresa, industria e competitividade desde unha perspectiva de futuro, poñendo en común experiencias e coñecementos de persoas que están a liderar proxectos empresariais diferentes”.
A elevada participación, con 50 empresas e aforo completo, evidencia o interese do tecido empresarial por abordar cuestións relacionadas coa competitividade, a transformación e o futuro da actividade económica desde unha perspectiva práctica e vinculada á realidade do territorio.
