Durante os traballos previos á obra que se vai realizar no parque infantil da Alameda de Noia, os operarios municipais detectaron que varios dos exemplares existentes presentaban un estado de deterioro moi avanzado.
En concreto, foi necesario retirar dúas árbores que estaban mortas e completamente ocas no seu interior, “polo que a súa permanencia supoñía un risco, especialmente nun espazo destinado ao uso e xogo dos máis pequenos”, engadiu o Concello.
Na liña de outras intervencións como a realizada no Campo da Feira e co obxectivo de explicar as motivacións da retirada, o Goberno local lembra que actúa sobre o arborado “cando o seu estado así o require, buscando garantir a seguridade e favorecer a conservación daqueles exemplares que teñen viabilidade”.
“O noso compromiso é contribuír a legar un parque arbóreo vivo, adaptado ás características de cada lugar e, sobre todo, con futuro”, explican dende o Consistorio.
