Localizado en Boiro o condutor que se deu á fuga este luns logo de atropelar a un viandante

Finalmente a Policía Local de Boiro informou da localización e identificación do condutor que perpetrou un grave atropelo na mañá deste luns 28 de setembro, sobre as 7.30 horas nas rúas da localidade, para posteriormente darse á fuga. Segundo fixeron saber os axentes, o condutor foi citado para prestar declaración sobre o suceso nas dependencias policiais. A localización foi posíbel grazas á eficacia do dispositivo habilitado pola Policía Local e a Garda Civil e á colaboración cidadá (os testemuños directos das persoas que puideron ver o suceso). Ao parecer, o condutor (unha persoa de idade avanzada) tivo tempo de levar o seu vehículo a un taller de Ribeira para a súa reparación despois do atropelo, comunicando unha causa diferente dos desperfectos do seu vehículo. Segundo confirmaron os axentes, a persoa atropelada foi rapidamente trasladada ao Hospital do Barbanza e o seu estado non é grave, malia o aparatoso do accidente (chegou a ser arrastrado un treito polo vehículo que o levou por diante, sen que o condutor non puidera ou non quixera decatarse do sucedido).