O Laboratorio Ecosocial do Barbanza foi seleccionado como un dos nove proxectos da categoría Europa Verde dos Premios Europa se Siente 2026, entre miles de iniciativas desenvolvidas con fondos europeos.
Esta candidatura pon en valor o traballo colectivo arredor dunha xestión máis sostíbel do territorio, a prevención de incendios e o impulso da bioeconomía local. Nesta fase do certame, o apoio da cidadanía será clave para conseguir o pase á final, xa que está aberta unha fase de votacións en liña na que podemos colaborar apoiando o labor do Laboratorio.
De entre miles de iniciativas con fondos europeos, o Laboratorio foi seleccionado como un dos nove proxectos da categoría Europa Verde.
Felicitacións do Concello da Pobra
Entre os concellos da nosa comarca que salientaron o recoñecemento ao Laboratorio e a súa carreira cara a final dos premios atópase o da Pobra do Caramiñal, que lembrou que durante o pasado ano, a Concellería de Promoción Económica mantivo varios encontros co equipo responsábel do Laboratorio. Desde esta área municipal tamén se organizaron xuntanzas coas directivas das comunidades de montes para darlles a coñecer a iniciativa.
Pola súa banda, a concelleira de Promoción Económica, Amparo Cerecedo, animou a veciñanza a participar na votación e apoiar unha candidatura vinculada ao territorio para que poida avanzar á seguinte fase dos premios.
De resultar gañador, indicou, “o recoñecemento daría maior visibilidade e apoio á comunicación do Laboratorio, favorecendo a difusión dos resultados acadados e o impulso de novas fases”.
O Laboratorio
O Laboratorio Ecosocial do Barbanza é unha iniciativa da Fundación RIA fundada polo arquitecto inglés afincado en Corrubedo David Chipperfield e do grupo de investigación HISTAGRA da USC, que naceu en 2020 co obxectivo de promover unha reactivación sostíbel do territorio a partir do coñecemento das comunidades locais. Ao longo da súa media década de andaina, o proxecto foi medrando en rede, incorporando axentes do territorio: comunidades de montes, universidades, administracións e outras entidades do terceiro sector. A Fundación RIA coordina este proxecto, integrado pola Plataforma pola Defensa del Monte, a Universidade de Santiago de Compostela (a través do CISPAC e os grupos de investigación HISTAGRA e UXAFLORES), a Universidade Pablo de Olavide, o Concello de Rianxo e a Fundación Montescola.
