Yolanda Carbia incorporarase ao Goberno de Padrón como concelleira de Educación e Cultura

23 Setembro 2026

María Yolanda Carbia Castro incorporouse ao Goberno municipal de Padrón tras tomar posesión como concelleira no pleno ordinario da Corporación celebrado este 23 de setembro. A nova edil cubrirá a vacante producida polo pasamento de Ana Castro García, para quen o alcalde tivo palabras de recordo e agradecemento. A sesión comezou gardando un minuto de silencio en memoria e lembranza de Ana Castro.

Licenciada en Ciencias Económicas e Empresariales pola USC, Yolanda Carbia leva máis de vinte anos dedicada á docencia. Actualmente é profesora de Formación e Orientación Laboral e secretaria do IES de Valga. Durante os oito meses que restan de mandato, asumirá as competencias de Educación e Cultura; Economía e Facenda; Persoal; Promoción do Emprego e Traballo, e Benestar Animal.

Antes de darlle a benvida á nova concelleira, Anxo Arca lembrou a “extraordinaria vocación de servizo público” de Ana Castro: “Durante os tres últimos anos da súa vida dedicouse a mellorar este pobo. Ata os últimos momentos estivo preocupada porque os padroneses e as padronesas tivesen as mellores oportunidades. Moitos dos proxectos nos que participou Ana serán desfrutados pola cidadanía durante mitos anos”, asegurou o alcalde.

De seguido, Anxo Arca deulle a benvida a Yolanda Carbia como nova concelleira de Padrón, “unha persoa con grande capacidade de traballo”. Tras entregarlle a insignia e a medalla a Corporación, o alcalde explicou que a incorporación de Yolanda Carbia leva aparellada unha ampla reorganización das áreas delegadas entre os membros do goberno socialista, así como das tenencias de alcaldía, como recolle o decreto asinado pola alcaldía.

Pola esquerda: Chus Campos Varela, Mariló Saco Vigo, Anxo Arca, Yolanda Carbia Castro, Laura Horta Ignacio e Luis Mariño Castro

Ademais das funcións propias da Alcaldía, Anxo Arca asumirá as áreas de Axenda 2030; Transición Ecolóxica; Información e Comunicación; Relacións Institucionais e cos Sectores Económicos; Seguridade Cidadá (Policía Local, Protección Civil e GES); Tráfico; Saúde Pública; Urbanismo, e Vivenda e Solo.

Pola súa banda, Chus Campos Varela continuará como primeira tenente de alcalde e responsabilizarase de Turismo; Festexos; Xacobeo 2027; Comercio; Medio Ambiente; Parques e xardíns; Limpeza Viaria, e Cemiterios.

Luis Mariño Castro pasará a ser o segundo tenente de alcalde. Terá ao seu cargo Deportes; Vías e obras; Abastecemento de Auga; Saneamento; Alumeado Público; Xestión Enerxética; Recollida e Tratamento dos Residuos; Praza de Abastos, Mercado Dominical e, en xeral, Venda Ambulante.

Laura Horta Ignacio ocupará a terceira tenencia de alcaldía e manterá as áreas que xa dirixía: Dixitalización e Modernización da Administración Local; Novas Tecnoloxías; Formación; Política Lingüística, e Participación Cidadá.

Pola súa banda, Mariló Saco Vigo continuará á fronte de Servizos Sociais; Igualdade e Muller; Relacións Veciñais; Terceira Idade; e Xuventude e Voluntariado.

Outros artigos

Publicidade

Revista en papel

Opinión

“Juan Magán” – Xulio Xiz

“Juan Magán” – Xulio Xiz

Estes días, Merce e máis eu, mergullámonos cada día no multitudinario ambiente festeiro, disfrutamos coa venerable presencia de Celtas Cortos e ousamos asistir ao concerto de Juan Magán. Con relativo coñecemento do actual mundo musical, que navega de Camilo a India,...

O Barbanza
Resumo de privacidade

Esta web utiliza cookies para que podamos ofrecerche a mellor experiencia de usuario posible. A información das cookies almacénase no teu navegador e realiza funcións tales como recoñecerche cando volves á nosa web ou axudar ao noso equipo para comprender que seccións da web atopas máis interesantes e útiles.