O certame Atlante consolida a relevancia internacional do centro museístico barbancés con participantes de 13 países.
O conselleiro López Campos destacou en Ribeira o prestixio dun certame que reuniu 203 pezas de 139 artistas procedentes de 13 países.
O pontevedrés Manuel Lareo acadou o Premio Galicia e a tailandesa Kawintra Sitthichai foi galardoada na categoría de creadores novos.
O Museo de Artes do Gravado á Estampa Dixital, en Ribeira, acolleu este sábado o acto de entrega da décimo sétima edición dos Premios Atlante de Gravado. O gravador italiano Fabio Riaudo, procedente de Turín, alzouse co galardón principal deste prestixioso certame, o Premio Ramiro Garregal Rey, nunha convocatoria que volveu evidenciar a súa pegada global ao reunir 203 obras presentadas por 139 artistas procedentes de 13 estados, incluíndo Macedonia, Tailandia, Turquía, Ucraína ou Polonia.
O conselleiro de Cultura, Lingua e Xuventude, José López Campos, participou na entrega dos premios e destacou o prestixio internacional acadado pola cita, así como a súa achega directa “á proxección da Galicia Calidade a través da arte”. O representante autonómico gabou o “talento soberbio”, a orixinalidade e o nivel técnico das obras concurrentes, subliñando que Galicia se consolidou como “un referente ao que mirar e admirar” dentro desta disciplina.
Palmarés diverso e talento novo
Xunto ao triunfo de Riaudo, o palmarés dos Premios Atlante completouse con distincións para o tamén italiano Vittorio Venturoli, a polaca Anna Trojanoska e as creadoras madrileñas Marina Luchetti e María Pastor.
No ámbito autonómico, o Premio Galicia distinguiu o traballo do pontevedrés Manuel Lareo. Pola súa banda, o crecente interese das novas xeracións polo gravado reflectiuse no Premio Atlante para menores de 25 anos, outorgado á tailandesa Kawintra Sitthichai. O xurado concedeu ademais cinco mencións de honra que recaeron en Teresa Gómez (Barcelona), Ovidiu Petca (Romanía), Claudio Lorenzo (México), Valle Baranda (Asturias) e José María Martínez (Cádiz).
Epicentro artístico no rural
Durante a súa intervención, López Campos puxo en valor o traballo sostido do Museo de Artes do Gravado á Estampa Dixital, cualificándoo como un enclave estratéxico para o tecido cultural galego. O titular de Cultura reafirmou o apoio constante da Xunta tanto á actividade ordinaria do centro como á consolidación dos propios premios.
“Co voso traballo erixistes a Ribeira, e polo tanto a Galicia, como un dos epicentros do gravado a nivel internacional”, concluíu o conselleiro, quen fixo fincapé no papel desta institución museística como axente dinamizador cultural de primeiro nivel desde o ámbito rural.
