O BNG da comarca da ría de Muros e Noia dará este domingo, 20 de setembro, o primeiro paso dun novo curso político coa mirada posta nas eleccións municipais de 2027, coa presentación das persoas que encabezarán as candidaturas nacionalistas nos concellos de Lousame, Outes, O Porto do Son, Muros e Noia.
O acto terá lugar ás 12:30 horas na praza do Tapal de Noia e contará coa participación da portavoz nacional do BNG, Ana Pontón, que acompañará as cinco persoas alcaldábeis nun acto público aberto e festivo para coñecer de primeira man as rostros do proxecto do BNG en cada recuncho da comarca.
Desde a organización comarcal destacan que as candidaturas están chamadas a representar “as ganas de transformar os nosos concellos e de demostrar que hai outra forma de gobernar, poñendo as persoas no centro das nosas políticas”, afirman.
“Volvemos a tenderlle a man á veciñanza para compartir este primeiro paso cara ás eleccións municipais de 2027.” conclúen. O encontro do grupo nacionalista rematará cunha sesión vermú ao son do DJ Casanova.
