O Consello Consultivo de Política Pesqueira celebrado onte en Madrid coa participación no mesmo da conselleira do Mar da Xunta Marta Villaverde, esta trasladou ao ministro de Agricultura, Pesca e Alimentación, a posición da Comunidade Galega sobre o futuro da Política Pesqueira Común (PPC) e reclamou unha participación máis efectiva das comunidades autónomas na definición da posición que España defenderá no Consello de Ministros de Pesca da Unión Europea (UE).
Marta Villaverde trasladou a necesidade de dotar estes encontros doutros formatos nos que se dea un maior protagonismo aos gobernos autonómicos e sinalou que Galicia botou de menos un traballo conxunto previo máis efectivo para abordar cuestións de especial trascendencia para o futuro do sector pesqueiro.
Neste senso, a conselleira defendeu que as comunidades autónomas, polas súas competencias e polo coñecemento directo das características dos seus sectores produtivos, deben ter unha participación activa na elaboración dunha posición común española sobre a futura PPC e o Marco Financeiro Plurianual 2028-2034. Por este motivo Galicia amosou a súa disposición a seguir traballando co Ministerio para avanzar cara a unha postura consensuada e sólida ante as negociacións europeas.
Galicia reiterou a necesidade de garantir, cando menos, 7.290 millóns de euros para pesca e acuicultura nese período e de facilitar a refinanciación dunha frota avellentada sen jncrementar a capacidade pesqueira neta.
A conselleira formulou as principais propostas que Galicia considera prioritarias cun financiamento garantido específico, viable, plurianual e protexido para a pesca e a acuicultura e reclama que os recursos non queden diluidos entre os fondos de carácter xeral para que non poidan ser desviados cara outras políticas .
O sector pesqueiro galego precisa destas accións específicas. Nomeadamente no que está a ser un dos momentos máis graves na historia dos últimos 30 anos.
