O Consello da Xunta desta semana informou dun proxecto de residencias de maiores que “permitirá crear 1.800 novas prazas” a través de 25 novos centros, dous dos cales estarán situados no Porto do Son e en Outes.
En termos xerais (a nivel galego), incrementarase a oferta actual de prazas residenciais en Galicia e a previsión é xerar un milleiro de postos de traballo, informou o Goberno autonómico, engadindo que “estes novos centros estarán distribuídos en concellos de menos de 25.000 habitantes que ata o momento non dispoñen de prazas residenciais públicas para persoas dependentes (graos II e III), coa finalidade de procurar a máxima cobertura e achegar estes recursos á cidadanía”.
Este proxecto desenvolverase mediante unha fórmula de colaboración público-privada na que a Xunta garante que “como mínimo o 60% das novas 1.800 prazas sexan de titularidade pública autonómica”, engadiu o Goberno galego.
Na provincia da Coruña as novas residencias estarán na zona Noia-Barbanza, cun centro principal no Porto do Son e outro de menor tamaño en Outes.
Tras o anuncio, o alcalde sonense, Luis Oujo, agradeceu “a disposición da Xunta para poder facer realidade unha gran demanda” e destacou que “para o bo ou para o malo, a poboación cada vez está máis envellecida e agora hai moita necesidade deste tipo de instalacións”.
Lembrou que o Concello do Porto do Son dispón dun terreo público de 14.000 metros cadrados situados fronte ao centro de día, “que está entre Portosín e O Porto do Son, moi preto da estrada” e que “ten unha localización espectacular, a carón da praia de A Aguieira, nun sitio estupendo para pasear por aí coas pasarelas ou ir ata o areal”, destacou o rexedor.
