Un auto dictado polo Tribunal Supremo desestima os recursos de queixa presentados por familiares dos finados no naufraxio do arrastreiro de Marín “Villa de Pitanxo” contra a decisión da Audiencia Nacional de denegar a interposición dun recurso de casación co que pretendían que o proceso por esta traxedia se tramitase coma un procedimento sumario, no canto dun abreviado.
O TS lembra na súa resolución que os autos da Audiencia Nacional só,poden ser recorridos en casación cando a lei así o autorice ou cando sexan autos definitivos que poñan remate ao proceso.
No caso do “Villa de Pitanxo” , lembra o alto tribunal que a Audiencia Nacional acordara continuar o proceso polos trámites do procedimento abreviado, mais o seu non foi un auto definitivo porque “non pon fin ao proceso, senón que permite que este continúe cara a fase intermedia e, eventualmente, ao xuizo oral”.
Deste xeito, a petición das familias non encaixa ba lei enxuizamento criminal, senón que se trata dunha “cuestión de estrita legalidade ordinaria”. Polo tanto, o auto da Audiencia Nacional non pon fin ao proceso e “a lei non da cobertura expresamente á casación fronte a este auto”, xa que logo a casación “non se pode converter nunha vía que poida utilizarse en calquera caso e fronte a calquera tipo de resolución so pena de facer que excedan a súa función e contido”.
Pola outra banda, o Supremo clarexa tamén que “non existe un sobreseimento encuberto”, e que tampouco existe un dereito “a que sempre e en calquera caso a lñatrte acyusadira seleccione e elixa o procedimento que se debe seguir no seu trámite”.
Os familiares dos mariñeiros falecidos no naufraxio solicitaran a transformación en procedimento de sumario ao coidar que houbo dolo eventual, é dicir, que o patrón e a casa armadora eran conscientes de que os incumprimentos que lles atribúen poderían ter como consecuencia o afundimento do buque.
Tanto a representación da armadora Nores como a do patrón do barco, José Enrique Padín, e máis a Fiscalía, opuxéronse aos recursos de queixa. A decisión do Supremo é firme e, polo tanto, fecha a porta ao recurso en casación e confirma, como diciamos, a tramitación como procedimento abreviado.
…
