Bandeiras anticonstitucionais e falanxistas, cánticos franquistas, insultos e odio cara a todos aqueles que non pensan como eles, é a imaxe desagradable e vergoñosa que demostraron un grupo de mozos, algúns menores de idade, na capital de España. Algúns nos preguntamos, entón, se son os fillos e netos dos franquistas ou ben simplemente son uns desgraciados manipulados pola dereita política e mediática?
Falan de España coma se o país fose deles, atrevéndose a insultar e acosar a outro numeroso grupo de mozos, e non tan novos, que están a loitar pola dignidade e o cumprimento constitucional do dereito á vivenda. Certo é que os mozos son o futuro e este terase que gañar a base de reivindicacións, compaxinando a loita nas rúas e nos despachos oficiais.
A vivenda leva sendo un problema enquistado no noso país, desde hai décadas, e nunca houbo a suficiente vontade política de propoñer medidas reais a non ser a construción descontrolada co único obxectivo do negocio privado, a usura e a especulación.
Recordo cando comezamos loitando en contra das entidades financeiras e os fondos de investimento, por falta de pagamentos da hipoteca, que desafiuzaban a miles de familias humildes e vulnerables das súas vivendas habituais e actualmente son moitos grandes propietarios, co beneplácito das diferentes Administracións Públicas que non son capaces de garantirlles unha alternativa habitacional.
