Este martes deu comezo o programa de emprego Talento Mozo “Xuventude II” destinado a mocidade de entre 18 e 30 anos e que levan a cabo de forma conxunta os concellos de Boiro, Rianxo e A Pobra.
O alcalde de Boiro, José Ramón Romero, acompañado polo director territorial de Emprego, Comercio e Emigración da Xunta de Galicia, Juan José Couce Prego; o concelleiro Roberto Lojo; e as concelleiras de Rianxo, Ana Vidal; e A Pobra, Amparo Cerecedo; deron a benvida ao alumnado.
Este obradoiro desenvólvese na especialidade de mantemento de xardíns e zonas verdes, unha cualificación profesional orientada á adquisición de competencias para a instalación, conservación e mantemento de xardíns, parques e zonas verdes. O alumnado traballador recibirá formación teórica e tamén práctica en xardíns e zonas verdes dos municipios de Boiro, Rianxo e A Pobra.
O programa está destinado a 16 mozos e mozas maiores de 18 anos e inscritos no Sistema Nacional de Garantía Xuvenil, que contan cun contrato de traballo será para a formación en alternancia, cunha retribución do salario mínimo interprofesional e unha xornada de traballo a tempo completo durante 12 meses en horario de 7.30 a 15.30 horas de luns a venres.
Este programa conta co financiamento da Consellería de Emprego, Comercio e Emigración mediante unha subvención de 478.994,36 euros.
