A actualidade cultural de Ribeira ten antecedentes no eido pictórico aos que, en contadas ocasións, botamos man para recoñecer un pasado non moi lonxano que non sei en que medida pode ter influido no feito de que, a día de hoxe, sexa un importante referente na comarca do Barbanza no que atinxe á expresión pictórica que, dito sexa de paso, un mestre compostelano afincado na cidade, Juan Emilio Álvarez de Prado, soubo como poucos trasladar a moitos dos seus alumnos, e que estes asumirçan a necesidade de facer chegar aos seus concidadáns posteriormente.
Gardo na memoria -un xa ten anos dabondo para este recurso que nos queda cando levamos cambiado follas e follas do calendario da nosa vida- traballos publicados ou exhibidos por. entre outros, Tucho Roibal -excelente debuxante e pintor-, Romero, Pepe Núñez (un moi prezado caricaturista), Xoan Fernández (que gañou renome na Europa nórdica após o éxito por el acadado en distintas exposicións realizadas Galicia adiante) ou Fidel Vidal (retratista e pintor), e anteriormente, Manuel Ayaso Dios (pintor expresionista e surrealista finado aos 89 anos en 2023, posuidor de numerosos premios internacionais).
Ribeira ten hoxe en día salas de exposicións coas que, nen moito menos, contaba hai pouco máis de 25 anos; sen embargo soubo crear espazos que, en boa medida, contribuiron -e contribúen- a manter vivo o sentido creativo da veciñanza e permite que se manteñan exposicións permanentes e itinerantes que dan carácter a esta cidade arousán que moi ben se pode gabar do seu recente pasado.
