A veciñanza de Ribeira cumpriu este sábado coa tradición ao honrar á súa patroa, Santa Uxía, nunha xornada central marcada polos actos relixiosos e o acompañamento musical nas rúas da vila.
O programa litúrxico iniciouse na igrexa parroquial cunha misa solemne cantada polos membros da Coral do Círculo Mercantil. Ao remate do oficio, a talla da santa percorreu a contorna do templo nunha procesión seguida por numerosos fieis. O acompañamento musical correu a cargo do grupo de gaitas Xiada e da Banda de Música Prudencio Romo de Lousame, formación que ofreceu un breve concerto no adro para pechar o acto.
A representación institucional contou coa presenza da alcaldesa, María Sampedro, do director xeral da Axencia Turismo de Galicia, Xosé Manuel Merelles, o ribeirense Salvador Mariño-Ageitos director xeral de Atención Primaria w Comunitaria xunto a outros membros da corporación municipal e membros de autorizades e institucións locais.
A programación festiva deseñada polo Concello prolóngase durante toda a fin de semana cunha combinación de citas relixiosas, actividades lúdicas e tradición popular.
