Un home perdeu a vida na noite deste martes despois de ser alcanzado por un turismo mentres camiñaba por un camiño da parroquia de Corvillón, no municipio de Cambados.
O Centro Integrado de Atención ás Emerxencias 112 Galicia recibiu o aviso minutos despois das nove da noite a través da persoa que viaxaba no vehículo implicado no sinistro. Na comunicación telefónica, alertou de que alcanzaran a un peón e advertiu da gravidade do impacto, sinalando que a vítima presentaba un forte golpe na cabeza.
Ata o punto desprazáronse con urxencia efectivos de Urxencias Sanitarias de Galicia-061, patrullas da Garda Civil de Tráfico e da Policía Local, así como membros do Servizo Municipal e da Agrupación de Voluntarios de Protección Civil de Cambados. Con todo, e a pesar dos esforzos dos profesionais sanitarios desprazados, unicamente se puido certificar o falecemento do home no mesmo lugar do accidente.
