A programación cultural de outono chega a Dodro cargada de actividades, da man da Área de Cultura do Concello. A axenda comezou este 4 de setembro cunha visita guiada polos Quinquilláns ás Torres de Hermida en Lestrobe e continúa o 13 de setembro cunha visita da Banda de Música de Padrón (ás 13.30 horas no campo da festa de Laíño, no marco do programa Ecos de Sar) e cunha charla sobre a sabedoría das curandeiras (o 18 de setembro ás 17.30 na Biblioteca). Setembro remata da man de Alba de Vales e a sesión Unha xograría de aldea (o 25 na Casa da Cultura ás 17.30h).
Outubro arrincará cunha xornada de cosmética ecolóxica (o día 2 ás 17.30 na Biblioteca), unha xornada sobre petróglifos con Carmen Domech (o 9 de outubro ás 17.30 na Casa da Cultura), unha sesión sobre a regueifa galega (o 17 de outubro ás 19h no Local Social de Montiño), o espectáculo para a rapazada Salvaxe, Salvaxe (o 23 ás 12h no CPI Eusebio Lorenzo Baleirón), a sesión familiar Conservas o noso (o 23 ás 17.30h na Biblioteca) e o espectáculo Espantamedos de Fantoches Baj (o 30 de outubro ás 17.30 na Biblioteca).
En novembro haberá programas de sensibilización e loita contra a violencia de xénero (do 9 ao 19 na Casa do Concello), o espectáculo Cinema Marabillas de Raquel Queizás (o 20 de novembro ás 17.30h na Casa da Cultura) a máis a deliberación do Premio de Poesía Eusebio Lorenzo Baleirón (o 21 de novembro ás 10h na Casa da Cultura).
