Un motorista perdeu a vida na tarde deste domingo tras sufrir unha saída de vía no termo municipal de Outes. O tráxico accidente produciuse arredor das 18:15 horas á altura do quilómetro 8 da estrada DP-5604, segundo confirmaron fontes do 112 Galicia. Polo de agora descoñécense as causas polas cales o condutor perdeu o control da moto, sen que conste a implicación de ningún outro vehículo no suceso.
Tras ter coñecemento do sinistro, o centro de atención ás emerxencias activou de inmediato un amplo operativo para socorrer á vítima. Ata o punto desprazouse o Servizo de Urxencias Sanitarias de Galicia-061, que mobilizou o helicóptero medicalizado con base en Santiago de Compostela para axilizar a atención médica.
No dispositivo participaron tamén efectivos do Grupo de Emerxencias Supramunicipal (GES) de Noia e axentes da Garda Civil de Tráfico, encargados de asegurar a zona e regular a circulación.
