Nestes días previos ao inicio da tempada escolar o Concello de Noia mantivo varias frontes de traballo abertas en materia de acondicionamento, poñendo a punto os colexios públicos do termo municipal.
Segundo informaron dende o Consistorio, tanto no CEIP Alexandre Rodríguez Cadarso, na Barquiña, coma no CEIP Felipe de Castro, en Bergondo, realizáronse diferentes labores de limpeza, roza, mantemento e adecuación dos espazos para que todo estea nas mellores condicións á hora de recibir de novo ao alumnado.
O Concello explicou que “son días de moito traballo nos centros, con patios que se preparan, zonas verdes que se acondicionan e pequenos detalles que se revisan antes de que volvan as mochilas, os recreos e a actividade ás aulas”.
Dende o Consistorio agradeceron a implicación de todo o persoal que está participando nestes días na posta a punto dos centros e “facendo posíbel que todo estea preparado para comezar”.
