- O aviso máximo afectará a 15 municipios das comarcas pontevedresas, mentres que o centro de Lugo, o interior da Coruña e a montaña de Ourense estarán en nivel laranxa.
- A entrada de aire cálido norteafricano deixará os valores máis altos durante as tardes do xoves e do venres, antes da chegada de tormentas a partir do sábado.
A Xunta de Galicia activou a alerta vermella por altas temperaturas para este xoves no interior da provincia de Pontevedra, tras os informes remitidos por MeteoGalicia e Meteosaúde. A situación meteorolóxica estará marcada polo posicionamento dun anticiclón no norte da Península Ibérica, que canalizará unha masa de aire cálido procedente do norte de África, provocando un notable ascenso dos termómetros diúrnos en boa parte da comunidade.
Ademais do nivel máximo no suroeste galego, o dispositivo de vixilancia establece a alerta laranxa noutras tres zonas: o interior da provincia da Coruña, o centro de Lugo e a montaña de Ourense.
Concellos en risco extremo e previsión
O aviso vermello céntrase en 15 termos municipais pontevedreses: Agolada, Campo Lameiro, A Cañiza, Cerdedo-Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.
Segundo as previsións meteorolóxicas, os valores máis extremos rexistraranse entre as tardes do xoves e do venres. A xornada do sábado continuará a ser calorosa, aínda que coa previsíbel aparición de nubosidade e treboadas no interior que iniciarán un descenso térmico moderado, antes da normalización definitiva dos termómetros agardada para o domingo.
