O Concello de Muros informou do inicio dos traballos correspondentes á obra “Saneamento en Agrocovo, Fase 2”, unha actuación que permitirá dotar esta zona de Esteiro dunha nova infraestrutura de saneamento.
A concelleira de Obras e Servizos, Laura Rivadeneira, visitou a semana pasada o lugar onde se desenvolven os labores xunto coa concelleira Maruxa Martínez.
Tras a visita, Rivadeneira sinalou que “esta obra permitirá dotar Agrocovo dunha infraestrutura de saneamento da que actualmente non dispón. É unha actuación importante para esta zona e unha mostra do traballo que estamos a desenvolver desde o Concello de Muros para seguir avanzando na dotación de servizos básicos”.
A obra contempla a instalación de novos colectores de PVC, pozos de rexistro e conexións das acometidas domiciliarias, así como novas canalizacións para comunicacións, baixa tensión e alumeado público. Tamén se executarán as correspondentes arquetas e se procederá á reposición dos firmes e pavimentos.
A actuación foi licitada e adxudicada por 90.400 euros e está financiada ao abeiro do POS+ Adicional 2/2025 da Deputación da Coruña.
Unha actuación coa que o Concello continúa ampliando e dotando de novas infraestruturas e servizos básicos diferentes zonas do municipio.
