Os roles de vento impediron a saída dos ORC na segunda xornada da Mar de Finisterre, na que só competiu a división Open.
O XII Trofeo Pitusa Sabín – Regata Mar de Finisterre coroou este domingo aos seus novos campións tras unha segunda e última xornada marcada pola inestabilidade meteorolóxica na Ría de Muros e Noia. Os constantes cambios de dirección e intensidade do vento obrigaron ao comité a anular as probas dominicais para os ORC —facendo valer os resultados do sábado—, mentres que a división Open si puido completar un trazado costeiro de 8,63 millas náuticas en sentido inverso ao da xornada inaugural.
Na división de barcos Open, o dominio absoluto quedou nas mans dos patróns locais do Real Club Náutico de Portosín. Na clase Open 1, o triunfo final foi para o Albatros, de Javier Arán, seguido polo Lubeca (Manuel Antonio Calo) e o Atlante (Ignacio Hermo). En Open 2, a vitoria levouna o Dracco, de Pablo Oliver, acompañado no podio polo Monte Ulía (Eduardo Arán) e o Totem II (Felipe Calle).
Cadro de honra nas clases ORC:
- División Regata: Vitoria para o Bon III (Víctor Carrión, CN Punta Lagoa), con prata para o Mirfak (Diego López, Comisión Naval de Regatas de Ferrol) e bronce para o Sara 3.0 (Rafael Blanco, MRCYB).
- Clase Cruceiro/Regata: Primeiro posto para o Orión (Javier Pérez, Monte Real Club de Yates de Bayona), seguido polo Ziralla Primero (Ramón Barreiro, RCN Sanxenxo) e o Deep Blue 2.1 (Vicente Cid, RCN Vigo).
Grazas a estes resultados, o Mirfak e o Deep Blue toman vantaxe sobre o Urbapaz e o Raygrass na pelexa polo prestixioso Trofeo Presidente Xunta de Galicia, ao que só lle restan dúas probas nos calendarios de Baiona e Sanxenxo para completar o circuíto galego.
A cerimonia de clausura estivo presidida por Pitusa Sabín e Jacinto Hernández, xunto ao presidente do Real Club Náutico Portosín, José Codesido; a deputada Rosa Quintana; o concelleiro de Deportes, Carlos Lorenzo; o presidente de Portos de Galicia, Juan Sanmartín; e o presidente da Real Federación Galega de Vela, Manuel Villaverde, acompañados por directivos da entidade anfitrioa.
