A intervención forma parte dun proxecto global de renovación de pavimentos en seis núcleos rurais, cun investimento total de máis de 153.000 euros a través do POS+.
O Concello de Boiro puxo en marcha as obras para o acondicionamento e mellora dos viais no lugar da Aspra, situado na parroquia de Bealo. O alcalde do municipio, José Ramón Romero, desprazouse ata a zona para supervisar de primeira man os traballos previos de preparación antes de acometer o pavimentado definitivo do firme.
A actuación responde ao avanzado estado de deterioro que presentan estes camiños públicos municipais, un problema que se agrava especialmente durante a época de choivas dificultando o tránsito habitual e o acceso da veciñanza ás súas vivendas.
Investimento con cargo ao POS+
Esta intervención intégrase dentro dun proxecto máis amplo de renovación de infraestruturas viarias en diversos núcleos do rural boirense. O conxunto das actuacións dispón dun orzamento global de 153.206 euros, financiado pola Deputación da Coruña a través do Plan Único de Concellos (POS+).
Ademais da Aspra, o plan abrangue a mellora de viais noutros cinco puntos do termo municipal:
- Boiro de Arriba
- A Armada
- Cubeliños
- Pazos de Coroño
- Saltiño
