A Festa da Dorna segue viva, reconverténdose mentres haxa risco sanitario e adoptando fórmulas que manteñan a seguridade e a saúde da xente. Esta semana comezou con grandes novidades anunciadas nas redes: primeiro a confirmación de que vai haber actividades online que compensen a falta de programa de rúa, e segundo a apertura do prazo para reservar o novo suadoiro das festas 2020, a LXXII Singradura.
O prazo remata o 4 de xullo e segundo confirma a Real e Ilustre Cofradía da Dorna, as unidades son limitadas por talles, polo que teremos que poñermos as pilas para desfrutar dunha prenda que, segundo confirman, “foi a única tela que non se usou para máscaras de protección”. O prezo inclúe un desconto de tres euros para “sosias e sosios”.
Ademais desta novidade, a confraría informa que as dorneiras e dorneiros teñen no novo local do Touro de Suministro Triñanes unha “obxecto misterioso de regalo por cortesía deste establecemento”, un agasallo que “nos fará a vida máis levadeira” e que se poderá recoller xunto co suadoiro nas ditas dependencias. Para botar man del, teremos que seguir as instrucións habilitadas na web da Festa da Dorna.
