O vicepresidente do Colexio Oficial de Graduados Sociais da Coruña e Ourense, David Doldán reuniuse na mañá deste mércores 22 de xullo co alcalde da Pobra do Caramiñal, José Carlos Vidal Suárez, iniciando así unha relación de comunicación e colaboración entre ambas as institucións. Entre outros asuntos, abordaron a situación da oficina do INSS na localidade, ofrecéndose a trasladar á Dirección Provincial da Seguridade Social, se fose necesario, calquera demanda de mellora do servizo.
A reunión co rexedor pobrense é a primeira das que desde o Colexio de GGSS coruñés solicitáronse con rexedores da provincia ante as queixas de varios deles con sede de oficinas do INSS respecto ás demoras na atención rexistradas, a falta de persoal e recursos.
“O feito certo”, explican dende o Colexio, “é que o sistema de solicitude de cita previa, que se universalizou en decenas de servizos públicos a resultas da pandemia está saturado, o que xera moitos problemas e afecta gravemente os usuarios máis maiores ou dependentes, que non teñen as capacidades dixitais da poboación de menor idade”. Amais, indican que a derivación a oficinas doutros municipios para unha cita presencial, ás veces a moitos quilómetros de distancia, “supón tamén unha discriminación que afecta de xeito máis grave a esa poboación envellecida ou dependente”.
Precisamente, o presidente do Consejo General de GGSS de España, Joaquín Merchán, mantivo este mesmo martes 21 unha reunión co directora xeral do INSS, Carmela Armesto para abordar diversas cuestións sobre a situación; entre elas, a necesidade de prestar correctamente o servizo de atención telefónica aos profesionais ou, por exemplo, resolver con máis celeridade as resolucións da IP.
