O verán é unha boa estación para o descanso, a lectura e a reflexión, sen esquecernos do goce da praia ou do monte, segundo as preferencias de cada quen. Cando miramos atrás dámonos conta da experiencia que adquirimos co paso do tempo e dos erros que cometemos, na maioría das ocasións, por facer uso da boa fe e o depositar a confianza en persoas que non a merecían.
A envexa, o rancor, a soberbia, a avaricia, a falta de empatía, a insolidariedade ou a ira case sempre nos acompañaron, ao longo da nosa existencia. Estivemos rodeados de todos os estados de ánimo posibles e destes elementos negativos que frearon noso camiñar cara á liberdade. Sempre baixo a influencia dos nosos familiares, amigos, compañeiros e veciños en xeral. Por non querer entrar en polémica, crear malestar ou simplemente tratar de facer borrón e conta nova, fomos escravos dos demais sen poder ser nós mesmos, en demasiadas ocasións.
Agora, como nos ocorre con esas dietas de adelgazamento que nunca comezamos, queremos comprometernos a non caer nos mesmos erros, tratando de cambiar situacións, deixando lonxe a negatividade e a maldade de certas persoas así como a contorna habitual para comezar unha nova etapa vital, máis plena e comprometida co que realmente vale a pena: a humildade, a solidariedade, a valentía, a empatía, a humanidade, a alegría. Sabemos que só iso levaranos á felicidade.
Enterremos o pasado, vivamos o presente, pensando no futuro das novas xeracións para que non teñan que botar a vista atrás para arrepentirse de certas decisións e poidan ser máis felices, seguindo os ditados do corazón, deixando de lado a cultura do consumismo, da soberbia e do egocentrismo endémico.
