O vindeiro venres 17 de xuño comezan na parroquia de Xuño (Porto do Son) as Festas de Santa Mariña, que se estenderán no tempo até o domingo 19. As festas comezarán o venres coa música matinal de Os Pequenos do Barbanza e logo cunha misa solemne na honra da Virxe do Carme ás 13.00 horas. Logo haberá unha sesión vermú amenizada pola Orquestra Alianza. Polo serán, ás 20.00 horas, haberá churrascada, toro mecánico e music box. Pola noite, verbena con Alianza e Discomóbil CDC.
O día seguinte, sábado, será o adicado a Santa Mariña. As actividades comezarán con música tradicional galego a cargo dos Rexoubeiros. Logo haberá misa solemne na honra de Santa Mariña. Ao mediodía celebrarase unha sesión vermú amenizada por Mariachis. Pola tarde haberá inchábeis e festa da escuma e pola noite verbena con Euphoria, Planet e Kike Varela.
O domingo será a xornada adicada a San Antonio. Comezará coa música dos Rexoubeiros e logo cunha misa solemne na honra de San Antonio. Máis tarde comezará unha sesión vermú coa orquestra Acordes, que repetirán pola noite, a partir das 23h, coa verbena nocturna. A xornada rematará co Discomóbil Planet.
Organiza a veciñanza da Comisión de Festas de Xuño coa colaboración do Concello do Porto do Son.
