Na mañá deste martes 7 de xullo o equipo do Concello de Noia despediu diante da Casa Consistorial un grupo de máis de cen peregrinos e peregrinas da Asociación de Senderistas de Montefrío (Granada), que proseguían na mesma xornada a súa ruta polo Camiño da Ría de Muros Noia en dirección a San Xusto.
Durante os últimos tres días percorreron diferentes etapas do itinerario, partindo de Muros e de Porto do Son, e elixiron Noia como punto de encontro, onde cada xornada fixeron unha parada para xantar, facer turismo, mercar e desfrutar na vila.
Dende o Concello quixeron saudalos antes da súa saída e acompañalos nos primeiros metros do percorrido, desexándolles un bo camiño nesta última etapa.
A Asociación de Senderistas de Montefrío é un colectivo deportivo e cultural moi activo da provincia de Granada. Dedícase a organizar viaxes e percorridos de montaña tanto en Andalucía como no resto de España.
