Os comerciantes de Ribeira reuníronse este martes 20 de outubro no local da AER (Asociación de Empresarios de Ribeira) para manifestar o seu malestar polos criterios de acceso á campaña MercaNaVila 2026, impulsada pola Deputación da Coruña e dotada con cinco millóns de euros para fomentar o comercio local a través de bonos de 100 descargábeis nos móbiles da cidadanía. A AER e as firmas que a integran manifestaron que “aínda que valoran positivamente estas axudas”, consideran “inxusto” que os establecementos de Ribeira queden excluídos por superar o municipio os 20.000 habitantes, a pesar de que o seu núcleo urbano principal non alcanza esa cifra.
Os comerciantes sinalan que os seus negocios “afrontan as mesmas dificultades que os doutras localidades beneficiarias” e advirten de que “esta exclusión pode favorecer que os consumidores se despracen a municipios veciños para aproveitar os descontos, prexudicando ao comercio de Ribeira”.
A Deputación manifestou a súa disposición para reunirse co sector comercial para escoitar as súas reivindicacións e estudar posibles medidas.
Os comerciantes de Ribeira non piden privilexios, senón “igualdade de oportunidades para competir e seguir dando vida ao comercio local”, por iso solicitan á Deputación que revise os criterios de acceso.
