O líder do PP, Núñez Feijoo, semella estar en contradición permanente consigo mesmo cando tenta analizar calquera circunstancia que teña que ver coas súas posibilidades de acceder á presidencia do Goberno español.
Desde aquel comentadísimo “non son presidente do Goberno porque non quero” á actual sementeira de dúbidas sobre a posibilidade de que o Goberno socialista que preside Pedro Sánchez teña a intención de aplicar a coñecida como “lei de netos” co obxectivo de incrementar o censo electoral do ano 2027, vai unha chea de análises e propostas que, polo de agora, se sustancian nunha proposición do propio PP no senso de outorgar unha especie de “plus” de deputados á lista que acade a maioría de votos nunhas eleccións, o que podería obviar a necesidade de pactos de goberno ou dependencias que reproduzan a actual situación.
Propón xa que logo Núñez Feijoo, unha reforma da lei electoral que, en 2027, cando se proxectan as próximas eleccións xerais, non se repitan a actuais experiencias dun goberno minoritario, o que fai cavilar que non ten moi seguro acadar a maioría, ou ben que fai cálculos en torno á posjbilidade de deixar a VOX na cuneta e gobernar en solitario dado o número de escanos que podería ter no Congreso dos Deputados, máis os engadidos.
Que os fillos e netos de migrantes españois sexan herdeiros da nacionalidade española e os dereitos que implica, só é posíbel se o descendente obtén a nacionalidade española de orixe, feito que lle outorga os mesmo dereitos civís, políticos e laborais que calquera outra persoa nada en España.
A chamada Lei de Netos ou Lei de Memoria Democrática, é unha normativa que permaneceu vixente ata outubro de 2025. Permitiu que fillos e netos de exiliados ou españois que migraron obter a nacionalidade española de xeito directo.
Os fillos e netos de españois de orixe que non puideron acceder á nacionalidade poden optar por solicitar un permiso de residencia e traballo legal por arraigo familiar. Após residir legalmente durante dous anos, pode solicitar a nacionalidade por residencia.
Máis nunca poderían participar nas eleccións de 2027.
