O Concello de Padrón celebrou este domingo o Día Internacional do Orgullo LGTBIQ+ cunha xornada festiva e reivindicativa na praza de Macías, onde veciñanza e familias participaron nas distintas actividades organizadas baixo o lema “Padrón con Orgullo”. O goberno local aproveitou a conmemoración para reafirmar o seu compromiso coa igualdade, o respecto á diversidade e a loita contra calquera forma de discriminación.
O acto institucional estivo marcado pola lectura do manifesto por parte da concelleira de Igualdade, Mariló Saco, quen advertiu de que os dereitos conquistados polo colectivo LGTBIQ+ “non poden darse por consolidados” ante o aumento dos delitos de odio e das situacións de discriminación e violencia por razón de orientación sexual, identidade ou expresión de xénero.
Durante a súa intervención, a edil lembrou tamén o asasinato de Samuel Luiz como un símbolo da necesidade de manter o compromiso institucional e social fronte á intolerancia. Así mesmo, trasladou a solidariedade do Concello con todas as persoas que sufriron ou sofren rexeitamento ou violencia por seren quen son.
No acto participou tamén o alcalde, Anxo Arca, xunto con integrantes do goberno municipal. O Concello renovou publicamente o seu compromiso coa promoción do respecto, coa educación en valores democráticos e coa defensa dunha sociedade inclusiva na que todas as persoas poidan desenvolver o seu proxecto de vida en liberdade e igualdade de oportunidades.
A declaración institucional concluíu cunha mensaxe clara: “A liberdade non se negocia, a liberdade deféndese e a diversidade celébrase”, proclamando un ano máis un “Padrón con Orgullo”.
A programación arrancou cun obradoiro de maquillaxe libre e sen xéneros, Rostros con orgullo, dirixido por Meiga-i e aberto a persoas de todas as idades. A continuación, Migallas Teatro representou o espectáculo familiar Elas pintan moito, unha proposta que achegou referentes femininos e valores de igualdade a través das artes escénicas.
A celebración rematou co concerto do grupo Broken Peach, que puxo o broche final a unha mañá marcada pola participación cidadá, o ambiente festivo e a reivindicación da diversidade como un dos piares dunha sociedade máis xusta, libre e igualitaria.
