O Concello de Noia vén de ampliar ata este venres ás 23:59 horas o prazo de inscrición para o I Campamento de Verán Xuvenil, unha iniciativa pensada para ofrecer á mocidade unha experiencia de convivencia, deporte e lecer no inicio do verán.
A ampliación do prazo responde ao interese xerado por esta actividade e permitirá que máis familias poidan organizar a súa participación. Desde o Concello lembran que aínda quedan prazas dispoñibles, polo que animan ás persoas interesadas a formalizar a inscrición antes de que remate o novo prazo.
O campamento está dirixido a mozos e mozas de entre 12 e 17 anos e celebrarase do 27 de xuño ao 1 de xullo no Albergue Xuvenil de Arnela, en Porto do Son. A proposta inclúe pernocta e un programa completo de actividades nun entorno natural privilexiado, co obxectivo de fomentar a convivencia e a creación de novas amizades.
Durante cinco días, os participantes poderán desfrutar de actividades como padelsurf, DiverJump Xuvenil, rutas polas praias, dinámicas de grupo e outras propostas de lecer e aventura. A iniciativa combina ocio, deporte e aprendizaxe, promovendo valores como a autonomía, o compañeirismo e os hábitos de vida saudables.
Con esta iniciativa, o Concello de Noia aposta por ofrecer alternativas de lecer de calidade para a mocidade, creando espazos onde compartir experiencias e aproveitar o verán dunha forma activa e enriquecedora.
As inscricións poden realizarse a través da Sede Electrónica do Concello de Noia ou no Rexistro Municipal. Desde o Concello lembran que as prazas son limitadas e que o prazo rematará este venres ás 23:59 horas.
