O Concello de Muros inaugurou este venres 5 de xuño o obradoiro dual de emprego Oe Monte Feixa, que promove coa colaboración do Concello de Carnota.
Desde este 5 de xuño, 13 alumnos e alumnas de Muros e 7 de Carnota participan neste programa mixto de emprego e formación para mellorar a súa empregabilidade.
“Durante os próximos nove meses, recibirán formación e desenvolverán tarefas profesionais remuneradas, ademais de obter unha capacitación profesional que lles permitirá optar a postos de traballo”, asegurou a alcaldesa de Muros, María Lago, que asistiu este venres 5 á inauguración do obradoiro na antiga fábrica de Sel xunto ao alcalde de Carnota, Juan Manuel Saborido; Javier Campa, da Consellería de Emprego da Xunta, e os gobernos locais de Muros e Carnota.
En Muros, concello promotor do obradoiro, impartiranse dous módulos de Aproveitamentos forestais e xestión da biomasa forestal e Actividades auxiliares en conservación e mellora de montes.
“Os concellos non temos competencias directas en materia de emprego, pero debemos organizar e xestionar actividades de formación que impulsen a inserción laboral da nosa veciñanza”, explicou a alcaldesa de Muros, María Lago, engadindo que “é unha satisfacción acoller este obradoiro”.
“Levar a cabo este tipo de formacións é o resultado dun traballo e un gran esforzo económico e humano desde as administracións implicadas”, apuntou a alcaldesa.
