O talento galego segue a abrirse camiño, estes días a moza compostelá Alba Domínguez Pena, con estreitas ligazóns coa parroquia de Castiñeiras, comeza a súa campaña de crowdfunding ou micromecenado na plataforma Verkami para a súa curtametraxe Foix. Logo de moito tempo escribindo e preparando este proxecto, traballo final do último ano de Dirección Cinematográfica na Escola de Cinema de Barcelona (ECIB), coa dirección de fotografía de Miranda Arjona Rodríguez, Alba está a piques de comezar a rodaxe da súa primeira curta de ficción.
Para poder facer realidade esta idea visual puxo en marcha a dita campaña en Verkami, unha plataforma de micromecenado onde as persoas poden apoiar proxectos mediante achegas para facer realidade traballos independentes coma este. Segundo a cineasta, calquera axuda é benvida por pequena que sexa, tamén é moi importante o feito de difundir o proxecto, dando a coñecer ás nosas artistas e amosando apoio de comunidade.
Indo ao proxecto en cuestión, Foix é un lugar concreto: Torrelles de Foix, un pobo mais tamén unha sensación de estar atrapada ou afundida nun lugar sen aparente saída, nun foxo. Foix, é en palabras da autora: un ollar íntimo sobre as relacións atravesadas polo control e a dependencia, e pola dificultade de romper con elas. En canto ao xénero desta curta, pódese achegar ao terror psicolóxico sen apoiarse no fantástico, senón no cotián, entendendo o xénero como ferramenta para falar de medos reais.
Alba estuda Dirección Cinematográfica en Barcelona e sempre que pode volta a Compostela e a Castiñeiras para recompilar historias, procurar inspiración e cargar as pilas para os seus proxectos.
