O conselleiro de Sanidade, Antonio Gómez Caamaño, presidiu este mércores 3 de xuño o acto de toma de posesión do médico Salvador Mariño-Ageitos Monteagudo (Ribeira, 1973) como novo director xeral de Atención Primaria e Comunitaria do Servizo Galego de Saúde, onde reafirmou a aposta da Xunta pola potenciación e reforzo deste nivel asistencial.
Ao acto tamén asistiu a conselleira de Política Social e Igualdade, Fabiola García, e a secretaria xeral da Consellería de Sanidade, Natalia Lobado, ademais de membros do equipo directivo e das distintas áreas sanitarias.
Na súa intervención, o titular da carteira sanitaria lembrou que “esta nova dirección xeral créase co obxectivo de consolidar este nivel asistencial como o verdadeiro motor e pedra angular do sistema sanitario público galego e para levar a cabo a reforma integral á que se comprometeu o Goberno galego”.
A Consellería de Sanidade busca así fortalecer o primeiro nivel asistencial e reforzar o seu papel central para potenciar os recursos existentes.
A nova dirección xeral de primaria asegurará a coordinación, o seguimento continuo e a correcta execución da reforma integral deste nivel asistencial, que a Xunta se comprometeu a presentar no primeiro semestre do ano.
Tamén dixo o conselleiro que este é un dos primeiros paso da reforma de primaria. Así, ademais de modificar a estrutura do Servizo Galego de Saúde tamén se potenciará o papel dos xefes de servizo.
Pola súa parte, o novo director xeral salientou que “a sanidade galega está entre as mellores do mundo, grazas aos seus profesionais, e afirmou que entende a atención primaria como o lugar no que se coida á persoa na súa totalidade e ao longo de toda a súa vida”.
Salvador Mariño posúe unha ampla traxectoria médica e de xestión ligada ao Servizo Galego de Saúde (SERGAS), culminada co seu nomeamento en xuño de 2026 como o primeiro director xeral de Atención Primaria e Comunitaria da Xunta de Galicia, cargo que este mércores 3 de xuño oficializouse formalmente. Salvador foi director do Hospital do Barbanza.
