O Taller Alecrín ven de poñer en marcha para os días 30 e 31 de maio dous obradoiros de danza jazz e outros dous de lindy hop en colaboración co Concello de Santiago e co Concello de Ribeira como complemento ao seu programa regular de cursos de linedance para singles e baile social para parellas.
A cita do Barbanza será o sábado 30 de maio no Polideportivo de Palmeira, en Ribeira.
A cita compostelá será este domingo 31 de maio na Casa das Máquinas de Santiago.
Ditos obradoiros estarán impartidos pola mestra, coreógrafa e bailarina Neus Castells especialista en danza jazz, lindy hop e balboa de Barcelona, cidade na que actualmente desenvolve a súa docencia en Swing Maniacs, un dos centros de baile máis activos do panorama actual do swing a nivel nacional e internacional.
Danza jazz será a proposta orientada a singles que queiran introducirse nesta técnica de baile que remonta a súa orixe á fusión de influencias que prosperaron no sur de USA a partir do século XVIII e que irrompeu no panorama internacional grazas ao cine e aos musicais a partir da segunda metade do século pasado.
Os obradoiros de lindy hop van orientados a parellas que desexen comezar a bailar esta modalidade ou xa estean a facelo pois é un obradoiro de iniciación no que se amosarán os diferentes principios dos que saen as múltiples variantes que hoxe despuntan en todo o mundo como herdanza deste contaxioso ritmo.
Ámbolos dous obradoiros son para adultos e a inscrición estará aberta ata o venres, 29 de maio. Para calquera información os interesados poden chamar ao Taller Alecrín no teléfono 698 150 432 de 10:00 a 14:00 horas.
