“Crer no sentido común é a primeira falta de sentido común”. Eugene O’Neill (1888-1953).
Dramaturgo estadounidense. Premio Nobel de Literatura en 1936.
O Debate sobre o Estado da Autonomía de Galicia, de abril do 2026, consolidou o discurso de Alfonso Rueda, enfocado, segundo el “na estabilidade, na xestión moderada e na reivindicación de gobernar con sentidiño”.
Desde a oposición e diferentes sectores de opinión, deixóuselle claro que a política que leva facendo o PP nos últimos 17 anos leva a Galicia a un declive evidente en materia sanitaria e que se continúan coa súa ideoloxía de desmantelamento e privatización do Sistema Sanitario Público, tal e como o coñecemos, acabaremos por ter unha Sanidade do terceiro mundo. A cidadanía perde dereitos sanitarios día a día e os que poden, acoden á privada para solucionar o ben máis prezado que teñen: a súa saúde!
Como se explica que os recortes do PP durante 17 anos, deixen a Galicia co número de camas hospitalarias máis baixo desde 1999? O Instituto Galego de Estatística, vén de publicar este informe onde aprecia que temos 3,27 camas por cada 1.000 habitantes no 2026, fronte a 3,6 que tiñamos en 1999. A media europea está en 5,1.
Como se explica que a Atención Primaria teña o 28% de prazas vacantes nos Centros de Saúde?
Segundo o Consello de Contas, o investimento en AP en Galicia é do 12%, moi lonxe do recomendado pola OMS que é do 25%. É isto gobernar con sentidiño? Temos que sufrir os galegos a neglixencia do goberno do PP en materia sanitaria e padecer os colapsos diarios para ser atendidos no SERGAS? O PP ten unha estratexia: favorecer os intereses dunha clase política, que non sofre desa “incompetencia” do día a día, pois acoden á privada, moito veces relacionada co investimento desde o público a cambio do seu apoio ás políticas neoliberais do PP.
Como é posible, segundo o Sindicato Médico de Granada, que os Médicos Residentes de Galicia de Primeiro e de Segundo ano, despois de 6 duros anos de estudo de Medicina, cobren menos que o Salario Mínimo Interprofesional? 1.152 e 1.207 €/mes. Somos a CCAA que menos paga aos seus residentes… Que “sentidiño” ten?
A Saúde Mental é un problema de enorme magnitude na actualidade. En Galicia, seguimos agardando polo anhelado Plan de Saúde Mental, consensuado, que permita saír do estancamento,
no que se atopa a xente que precisa deste servizo. Temos 26 psicólogos clínicos para todo o país. Un psicólogo clínico para 103.846 persoas! Ten isto sentidiño? Rueda prometeu 2 psicólogos máis na AP…para 400 Centros de Saúde…A cociente é de 6 psicólogos clínicos por cada 100.000 habitantes. No estado estamos en 9-12 e na Unión Europea 19.
Que país pode soportar ter a 49.554 persoas nunha lista de espera para cirurxía a finais
do 2025? Datos do Ministerio de Sanidade. Ten algún sentidiño?
Pero cando falamos de Incompetencia ou Estratexia, temos que referirnos á Débeda Pública. O que gasta o PP en Galicia é moito máis do que ingresa (cun orzamento para 2026 de 14.000 millóns de €). Se non teñen “problema de chequeira” (Rueda dixit) que sentidiño ten? Segundo dados do Banco de España, ao 31 de decembro do 2025, o endebedamento era de 12.010 millóns, 8.056 millóns de € máis que hai 17 anos…
Pero os desmáns non quedan aquí: no ano 2022, a Xunta, deixou sen executar máis da metade dos fondos europeos dispoñibles. Ten isto sentido? E aínda por encima, rexeitan a condonación da débeda de 4.010 millóns de €.
Rueda, no debate do Estado da Autonomía do 2024 dixo: “Crearemos 24 centros de maiores, con 1.800 novas prazas de atención, en concellos de menos de 50.000 habitantes…”. E que casualidade: dixo o mesmo no 2025… Ademais de tomarnos por parvos, pensa que non temos memoria e que pode seguir engaiolando á xente… pero xa non coa! E a última ocorrencia destes “bos xestores” é o tema das baixas laborais.
Rueda ten unha teima importante para tomar sempre medidas que prexudican aos traballadores e benefician ás clases máis favorecidas. Esta medida, pon en cuestión a actitude dos médicos (que os volve a poñer na palestra da opinión pública) e a dos traballadores (aos que considera vagos e faltos de profesionalidade).
Tamén pon en cuestión o Sistema de Inspección co que conta o SERGAS. Ademais, dálle ás mutuas (de carácter privado, claro) a capacidade de propoñer as altas por encima da propia inspección. Datos da Autoridade Independente de Responsabilidade Fiscal.
Ten todo isto sentidiño ou Eugene O’Neill tiña razón?
Xosé María Dios Diz é médico especialista de AP de Outes. Maio 2026.
